Bugungi kunda kredit uyushmalari ham tijorat banklari qatorida mikromoliyaviy xizmatlar ko'rsatish sohasida muhim o'rin tutmoqda.

Kredit uyushmalarining faoliyati birinchi navbatda respublikamizning uzoq tumanlarida yashovchi aholining, shuningdek kichik biznes va xususiy tadbikorlik sub'ektlarining moliyaviy resurslarga bo'lgan ehtiyojlarini qondirishga qaratilgandir.

O'zbekiston Respublikasi Markaziy banki va Moliya sohasini rivojlantirish Agentligi hamkorligida tashkil etilgan seminar kredit uyushmalari tizimida barqarorlikni ta'minlash va ularni yanada rivojlantirish masalalariga bag'ishlandi. Unda kredit uyushmalarining kengash raislari hamda ijro etuvchi organ rahbarlari ishtirok etdilar.

Seminar davomida nobank kredit tashkilotlarida ichki nazoratni tashkil etish, kredit uyushmalari tizimidagi asosiy ko'rsatkichlarning o'zgarish tendentsiyasi va tizimni rivojlantirish bo'yicha amalga oshirilayotgan chora-tadbirlar, kredit uyushmalari tomonidan hisobotlarni tuzish va ularni taqdim etish hamda kredit uyushmalari faoliyatini tahlili va ularni joyida tekshiruvdan o'tkazish jarayonida aniqlanayotgan kamchiliklar hamda ularni bartaraf qilish masalalari ko'rib chiqildi.

Seminar davomida ishtirokchilar kredit uyushmalari tizimini yanada mustahkamlash, ular faoliyatini tashkil etish va tartibga solish bo'yicha mavjud me'yoriy-huquqiy bazani takomillashtirib borish borasidagi o'z takliflarini bildirishdi.

Shuningdek, seminar davomida ishtirokchilar o'zlarini qiziqtirgan barcha savollarga batafsil javoblar oldilar.

Источник: Markaziy bank